
Ултразвучниот преглед е еден од основните методи за следење на бременоста. Со него се проценуваат развојот и растот на плодот, неговата анатомија, положбата на постелката, количината на плодовата вода и други параметри важни за здравјето на трудницата и плодот.
Во нашата ординација ултразвучните прегледи се приспособуваат според гестациската возраст, медицинската историја и наодите од претходните прегледи.
Ултразвук во првиот триместар
Во раната бременост ултразвукот овозможува потврдување на интраутерина бременост, проценка на виталноста на ембрионот, утврдување на гестациската возраст и бројот на плодови.
Меѓу 11+0 и 13+6 гестациски недели може да се изврши специјализиран ултразвучен скрининг за проценка на раната анатомија на плодот и одредени маркери поврзани со хромозомски нарушувања.
Повеќе за ултразвучниот скрининг во првиот триместар
Ултразвук во вториот триместар
Во вториот триместар се спроведува детален ултразвучен преглед на анатомските структури на плодот, најчесто околу 18–22 гестациски недели.
Се проценуваат мозокот, лицето, ’рбетот, срцето, абдоминалните органи, екстремитетите и други структури, како и положбата на постелката и количината на плодовата вода.
Уреден ултразвучен наод не ги исклучува сите можни вродени аномалии. Некои нарушувања не се видливи при прегледот или се развиваат подоцна во бременоста.
Повеќе за ултразвучниот скрининг во вториот триместар
Ултразвук во третиот триместар
Во третиот триместар ултразвучниот преглед може да се користи за проценка на растот и положбата на плодот, количината на плодовата вода и положбата на постелката.
Кога постои медицинска индикација, прегледот се дополнува со доплер-анализа на крвните протоци, особено при сомневање за застој во растот на плодот или други компликации.
Доплер-анализата не е задолжителен дел од секој рутински ултразвучен преглед кај некомплицирана бременост.
Повеќе за доплер-анализите во бременоста
Разлики меѓу 2D, 3D, 4D и 5D ултразвук
2D ултразвук — стандардниот дводимензионален приказ кој претставува основа за медицинска проценка на анатомијата, растот и развојот на плодот.
3D ултразвук — овозможува тридимензионална реконструкција на избрани структури. Во одредени ситуации може да помогне во дополнителна проценка на површински анатомски особености, но не го заменува стандардниот 2D преглед.
4D ултразвук — претставува тридимензионален приказ во реално време, со можност за визуелизација на движењата на плодот.
5D ултразвук — комерцијален назив за одредени технологии на обработка и прикажување на тридимензионални ултразвучни слики, вклучувајќи автоматизирани поставки и реалистично осветлување. Терминот не означува посебна петдимензионална медицинска метода.
Пореалистичниот изглед на 3D, 4D или 5D сликите не значи автоматски поголема дијагностичка точност.
Квалитетот на приказот зависи и од положбата на плодот, гестациската возраст, количината на плодовата вода и други технички и индивидуални фактори.
Безбедност на ултразвучните прегледи
Дијагностичкиот ултразвук не користи јонизирачко зрачење. При соодветна медицинска употреба, досегашните научни податоци не покажуваат потврдени штетни ефекти врз плодот.
Сепак, ултразвучната енергија може да предизвика физички ефекти во ткивата. Затоа прегледите треба да се изведуваат од обучени медицински лица, со соодветни поставки и времетраење, според принципот на најниска разумно потребна изложеност.
3D, 4D и 5D визуелизацијата може да биде дополнителен дел од медицинскиот преглед, но не треба да биде причина за непотребно продолжување на ултразвучната изложеност само за добивање фотографии или видеоснимки.
Индивидуален пристап
Изборот на ултразвучни испитувања зависи од гестациската возраст, текот на бременоста и медицинските индикации.
Најважни се систематската медицинска проценка, правилното толкување на наодите и навременото препознавање на состојби кои бараат дополнително следење или испитување.
Содржината е информативна и не заменува лекарски преглед. Подготвена и стручно проверена од д-р сци Иво Захариевски.